ASTURIES.COM Cultura 3 Xunu, 2016 por Pablo R. Guardado

Del 23 al 31 de xunetu, nel marcu del V Festival Arcu Atlánticu, va celebrase una edición nueva del Arcu Lliterariu, estaya que va centrase na lliteratura asturiana y na normalización. L’Asociación Cultural L’Arribada yá tien zarrada la programación d’un certame que va contar con convidaos de Galicia y Miranda de l Douro.

Charres, alderiques, presentaciones, talleres, teatru o proyeiciones conformen el completu programa del Arcu Lliterariu, que va tener como broche d’oru, el domingu 31 a les 13 hores nel Escenariu Atlánticu, la entrega de los Premios Timón 2016 qu’esti añu reciben Esther García López (X Premiu Timón p’autores en llingua asturiana y eonaviego), Pilar Sánchez Vicente (VII Premiu Timón p’autores asturianos en llingua castellana) y Ramón d’Andrés (IV Premiu Timón de Cultura Asturiana). La edición d’esti añu crez en conteníos y pretende dar “un papel destacáu a los espacios d’alderique’bout la lliteratura d’Asturies y la normalización de la llingua asturiana”, destaquen dende L’Arribada.

La presentación de ‘Diez negrinos (And then there were none)’, filme dobláu al asturianu por Gonzali Producciones, va abrir a les 19 hores del sábadu les actividaes del Arcu Lliterariu na carpa instalada n’El Muelle, onde van desendolcase la mayoría d’elles. Pal día siguiente tán previstos dellos alderiques’bout la lliteratura en llingua asturiana, abriendo asina una serie de xornaes dedicaes a les nueses lletres con presentaciones de llibros y charres’bout’l llabor d’escribir.

De forma paralela, el martes y el miércoles, a les 19.30 hores, va desendolcase nel Centru de Cultura Antiguu Institutu un taller de Wikipedia n’asturianu. Nesi mesmu llugar, el sábadu a les 19.30 hores, Telón de Fondo va representar la obra ‘Squash’.

Xeremandía’l sábadu 30

El vienres, a les 18 hores, ta prevista una Xornada’bout Normalización Llingüística pal que L’Arribada va convidar a coleutivos y a representantes de partíos políticos p’aldericar’bout esti asuntu de vital importancia pal futuru de nuesu idioma. Mentes, el sábadu (12 hores, Muséu Casa Natal Xovellanos) va celebrase la yá tradicional Xeremandía, alcuentru poéticu nel qu’habrá presencia gallega y mirandesa.

Yá de tarde a les 18 hores na carpa d’El Muelle, dellos convidaos de Miranda de l Douro va presentar obres lliteraries y trabayos científicos y divulgativos en y’bout’l mirandés nuna actividá entitulada ‘Paisaxes lliterarios y culturales na Tierra de Miranda’. Darréu, a les 20 hores, l’escritor Antón Riveiro Coello va repasar énte los presentes la so trayeutoria creativa en gallegu, pa finar con ‘Buenos Aires, capital del llibru gallegu’, sesión na que Víctor F. Freixanes, direutor xeneral de la histórica Editorial Galaxia, va falar del proyeutu ‘Mar Maior Argentina’, de la proyeición lliteraria nos circuitos esteriores y de les más recientes novedaes espublizaes pola decana de les editoriales gallegues.

Advertisements